Тропари Божией Матери

Тропарь Божией Матери пред иконой Ее Иерусалимской

глас 4

Богорадованная Владычице,/ препрославленная Мати щедрот и человеколюбия,/ всемилостивая о всем мире Ходатаице!/ Прилежно раби Твои ко Твоему предстательству прибегаем,/ и ко пречудному образу Твоему со умилением, припадающе, молимся:/ молитву теплую Сыну Твоему и Богу нашему сотвори,/ о Всепетая Царице Богородице,/ да от всяких болезней и печалей нас Тебе ради избавит,/ и от грехов всяких свободив,/ Царствия Своего Небеснаго наследники ны покажет:/ велие бо и неизреченное яко Мати к Нему дерзновение имаши/ и вся от Него испросити можеши,// Едина во веки преблагословенная.

Ин тропарь Божией Матери пред иконой Ее Иерусалимской

глас 3 

Твоего предстательства уверение/ и милосердия Твоего явление/ икона Иерусалимская нам, Владычице, показася/ пред нею же души наша в молитве изливаем/ и верою Тебе вопием:/ воззри, Милосердая, на люди Твоя,/ вся скорби наша и печали утоли,/ утешение благое в сердца наша низпосли// и спасение вечное душам нашим, Пречистая, испроси.

Кондак Божией Матери пред иконой Ее Иерусалимской

глас 5 

Не отрини, о Милосердая Мати,/ слез и воздыханий наших,/ но прошения наша милостивно приимши,/ пред Иерусалимскою иконою Твоею/ молящихся людей веру укрепи,/ умилением сердца их исполни,/ и крест земнаго жития нести им помози,// елика бо хощеши можеши.

Кондак Божией Матери

глас 6

Предстательство христиан непостыдное/ ходатайство ко Творцу непреложное/ не презри грешных молений гласы/ но предвари, яко Благая, на помощь нас, верно зовущих Ти/ ускори на молитву и потщися на умоление// предстательствующи присно, Богородицу, чтущих Тя.